點解要take drugs？
－ 多角度剖析青少年濫用藥物的原因
青少年濫藥者之現場搜查
－ 濫藥青少年親身表達玩藥心態
點解要take drugs？
這是一般人常會問的問題，而真相卻不只存在一個簡單的答案。
有些人第一次濫用藥物可能是為了好玩，有些則可能想忘記不開心的事而嘗試，這反映每個人濫藥的原因都會各有不同。
進一步來說，濫藥者於其學業 / 工作上的情況、家人關係、朋友關係、日常生活習慣等方面都會直接或間接影響青少年出現濫藥的行為。針對香港特殊情況，有以下七點分析：
1. 廣泛流通 - 由於現時很多常被青少年濫用的藥物的製造過程簡單，所以大量流通於的士高(Disco)、卡拉OK及狂野派對(Rave Party)等場地中，而青少年亦十分容易接觸到這些毒品而濫用。
2. 價錢便宜 - 市面出售的藥物價錢大約$40至$200元左右，視乎來貨質素、平日或假日及新舊貨之分而有高低。便宜的消費能吸引青少年購買，也是他們能力負擔得來。
3. 教育貧乏 - 面對濫藥問題之急速轉變，實在有需要將預防濫用藥物的教育工作融入正規的教育課程中，可惜目前仍未有開展有關工作。另外，本港現時仍沒有正規的途徑向濫藥者進行倡議及教育等工作。
4. 傳媒渲染 - 報紙及娛樂雜誌時常正面報導明星於的士高及狂野派對玩樂的情況，象徵時尚及前衛的意識，鼓吹玩樂及追尋刺激，間接促使青少年嘗試毒品。
5. 玩樂文化 - 到派對或的士高跳舞已是現時香港青少年閒時的活動，他們很容易受到狂歡氣氛的影響而濫用藥物。
6. 朋輩影響 - 青少年到的士高玩樂，很多時看到朋友濫用，便在朋輩的壓力下濫用藥物。
7. 官能刺激 - 有些人認為濫用藥物是玩樂的助慶品，會玩得「Free」Ｄ和「放」Ｄ。
青少年濫藥者之現場搜查
如想深入探討青少年濫藥原因，最直接有效的方法就是問問現正濫藥的青少年。於是，我們的記者親身走到全港青少年濫藥之高危地點，訪問他們玩藥的心態。
以下是他們在現場的即時回應：
1：點解落嚟玩？
「睇戲、唱K、落D同蒲RAVE都係時下嘅消閒娛樂節目。」
「一大班人落嚟玩真係好開心㗎！」
「我鍾意『依』度D歌，氣氛正又啱FEEL。」
「落嚟可以玩得比平日放D，玩得癲D都冇人會理您。」
2：點解要食藥？
「係人都食㗎啦，食咗會玩得開心D嘛。」
「齋跳好悶咋，食咗會跳得起勁D。」
「定期有新嘢(即新藥)，每次食咗都會有唔同嘅FEEL，正！」
3：食完真係咁開心唔會有事？
「試過『FREE』大咗，成個人跌低喺舞池，要人扶埋一邊坐。」
「梗係唔係，食到『OD』(即過量)就大獲，輕則『人財兩失』(意即被偷錢、失身(被強姦甚至輪姦))，大則『有仔有病』(因性接觸而患上性病甚至懷孕)。」
「咪食得醒D囉，好似飲酒咁，知道幾時到頂就唔飲，HI藥咪又係同一道理。」
4：有冇試過食完唔舒服？
「好疲倦，有時瞓到冇晒知覺咁。」
「冇心機返學，不過唔食都冇心機㗎喇！」
「試過嗦K嗦到流鼻血，好痛呀….」
「有時第二朝喺屋企會聽到『依』家播緊D歌，『依』D算唔算『幻聽』呀？」
5：既然食藥有咁多唔好處點解仲要食？
「就係想食咁簡單！」
「成班人落嚟就會食咋！」
「食嘅時候冇您咁多問題會諗噃！」
6：您有冇考慮唔嚟玩、唔食藥？
「黐線！」
「冇喎！」
「玩到悶先算！」
7：您估計您父母知道您「依」家咁樣佢地會有咩反應？
「我老豆都嗦Ｋ啦！」
「有咩反應呀！？嚟玩咋，又冇做錯事，可以有咩反應喎！」
「點知呀，我又唔係我老豆老母肚裏面條蟲。」
「佢地都會去玩啦，頂多咪叫我唔好食Fing頭、嗦Ｋ囉！」
以上對話全文錄自受訪的青少年，沒有增刪
心態剖析
從以上的對話可以看出，現今濫藥的青少年並不是「無頭無腦」去濫用藥物。
相反，他們很多時都對精神科藥物的資訊有一定的認識和了解。
現時進行預防青少年濫藥教育工作最棘手的地方，就是一部份玩藥青少年清楚知道濫藥的壞處，可是他們仍然繼續沉淪於藥海中，並不理會那遙遠的濫藥後遺症，亦不想太遠的將來。
這種現況亦同時反映出濫藥行為只是一個表徵問題，還有個人和社交環境等多方面的因素去影響他們玩樂及濫藥的生活模式。